Qırımtatar halqı Meclisiniñ reisi Refat Çubarovnıñ Qırım Baş naziri Anatoliy Mogilöv ile körüşüvi

Все новости
12 şubat 2014 yıl 18:11

Körüşüvde bunıñ kibi de Meclis reisiniñ muavinleri Ayder Acimambetov, Nariman Celâl, Aslan Ömer Qırımlı, Zaur Smirnov, Ahtem Çiygoz, Qırım Nazirler Şurası reisiniñ muavini Aziz Abdullayev ve Qırım Milletler komitetiniñ reisi Refat Kenjaliyev iştirak ettiler.

Körüşüv devamında qırımtatarlarnı yerleştirüv boyunca tedbirlerni 2014 senesinde finansirlev, Ukraina Yuqarı Şurasına "Milliy mensüpligine köre sürgün etilgen şahıslarnıñ aqlarını ğayrıdan tiklev aqqında" qanunını qabul etmesine qoltutuv, Qırım Yuqarı Şurasına deputatlarnı saylav qanun leyhasını beraberlikte işlev, Qırım Yuqarı Şurasında, şeer ve rayon şuralarında qırımtatarlarnıñ kefaletli temsilciligi, qırımtatar halqınıñ aqlarını ğayrıdan tiklev boyunca halqara forumnı keçirüv, qırımtatar halqı sürgünligi qurbanlarınıñ hatırasına bağışlanğan matem merasimlerini beraberlikte azırlav ve keçirüv, daa bir sıra diger meseleler muzakere etildi.

Körüşüvde Meclis reisi 2014 senesine qırımtatarlarnı yerleştirüv programmasınıñ finansirlenmesine devlet ve cumhuriyet bücetlerinde belgilengen sermiyanıñ kölemi pek az olğanını qayd eterek, Qırım baş nazirine finansirlevni arttıruv boyunca em Qırım Yuqarı Şurasına, em Ukraina Yuqarı Şurasına tekliflerni yollamaqnı teklif etti.

Öz nevbetinde Qırım baş naziri Anatoliy Mogilöv Qırım ükümeti Ukraina Nazirler kabinetine yollağan mektübinde Ukraina devlet bücetinde közde tutuluğan inkişaf fondından qırımtatarlarnıñ yerleştirilmesine 50 million grivnâ kapital salım ayırılması rica etilgenini bildirdi. Refat Çubarov Qırım Yuqarı Şurası ve Nazirler Şurasına "Milliy mensüpligine köre sürgün etilgen şahıslarnıñ aqlarını ğayrıdan tiklev aqqında" qanunını 2014 senesi mayıs 18-ge qadar ekinci oquvda qabul etmek ricasınen Ukraina Yuqarı Şurasına muracaat etmek teklifini seslendirdi.

Anatoliy Mogilev bu mesele bivasta Ukraina parlamentiniñ işi olğanını qayd eterek, mezkür qanunnıñ qabul etilmesi devletten qoşumca masraflarnı talap etecegini añlattı.

Meclis reisiniñ muavini Zaur Smirnov bu meseleniñ muzakeresinde soñ noqta qoymamaqnı ve bu meselege tekrar qaytmazdan evel bu qanunnıñ amelge keçirilmesi içün kerek olacaq tahminiy finans masraflarnı ğayrıdan azırlamaqnı teklif etti. Anatoliy Mogilöv bu teklifnen razı oldı.

Qırımtatarlarnıñ Qırım Yuqarı Şurasında kvota temsilciligi meselesine Anatoliy Mogilöv menfiy yanaşıp, bu printsipniñ kerçekleştirilmesi yaramay neticelerge ketirebilir, dep sayğanını bildirip Lund tevsiyelerini hatırlattı.

Refat Çubarov ise öz nevbetinde bir sıra Avropa devletlerinde, cümleden İtaliyadaki Cenübiy Tirol muhtariyetindeki qanunâratıcı, vekâletli ve icra organlarında milliy cemiyetlerniñ kefaletli temsilciliginiñ müsbet neticelerini misal etip kösterdi.

Mayıs 18-ge qadar Qırımtatar halqınıñ aqlarını ğayrıdan tiklev boyunca halqara forumnı keçirüv meselesini muzakere eterek Anatoliy Mogilöv Refat Çubarovnen birlikte Ukraina Tış işleri naziriniñ vazifesini eda etken Leonid Kojara ile körüşmege azır olğanını ayttı.

Bunıñ kibi de taraflar 2014 senesi qırımtatar halqı sürgünligi qurbanlarınıñ hatırasına bağışlanğan matem merasimleri, diger kütleviy tedbirler, şu cümleden Bütünqırım Hıdırlez bayramını beraberlikte azırlamaq ve keçirmekni añlaştılar.

Körüşüv iştirakçileri soñunda Ukrainadaki vaqialar ve olarnıñ Qırımda aqibetleri hususında fikir paylaştılar. Cümleden, Meclis reisiniñ muavini Ahtem Çiygoz Meclis yarımadada er angi mudafaa otrâdlarınıñ tizilmesine menfiy baqqanını bildirdi.

 

Meclis matbuat hızmetiniñ malümatına esaslanaraq

Foto