Cuma Cami qurulacaq yerde ücüm etilgeni boyunca Qırım Müftiyatınıñ beyanatı

Все новости
01 aralık 2012 yıl 18:57

 

     Qırım musulmanları diniy idaresi bu vaqianı Qırım musulmanlarına nisbeten nefretniñ nevbetteki köstermesi olaraq tanıy.

     Şübesiz, bu cinayet, yarımadamızda istiqrar ve beraber barışıq yaşap kelgenini istemegen, ayrı bir küçlerniñ provokatsiyasıdır.

     Qırımda kergin ve zıddiyet areketlerge yol bermege er daim tırışalar. Musulman mezarlıqlarnıñ qılınması, musulmanlarnıñ abidelerine ücüm etüvler bunı tek isbat ete. 

     Qırım cemiyeti böyle provokatsiyalarğa qulaq asmamalı. Er bir insan Qırım bizim umumiy evimiz olğanını añlamaq kerek ve yarımadanıñ kelecegi içün mesülietni sezmeli.

     Böyle cinayetlerni yapqanlar tek Cinaiy Kodeksi boyunca degil de, cemiyet fikiri ile takbih etilmeli.

     Barışıq saqlap qalğanı ve aydutlıqnıñ,şu cümleden nefret duyğularınıñ, kenişlememesi içün büyük bir rol uquq qoruyucı organlar hadimleriniñ mütehassıslıq seviyesi oynay. Diniy sebeplerden yapılğan, cinayetler tez sürette çezilse edi, bugün Yaltinskaya soqağı, 22 adresi boyunca patlavlar, belki de, olmaz edi. Cezasızlıq, mezeplerara ve milletlerara zıddiyet esasında yapılğan, cinayetler sayısını arttıra.

     Qırım Müftiyatı uquq qoruyucılarnı işbu cinayetke mesül yanaşmaq ve qabaatlılarnı tapmağa çağıra.

     Biz ümüt etemiz ki, bu cinayetni yapqan, adamlar, eñ yaqın zamanda vekâletli organlar tarafından tapılır ve Ukrainada işletilgen qanunlar boyunca ceza çekecekler.

Qırım musulmanlarınıñ müftisi haci Emirali Ablayev

Muftiyat Matbuat merkezi

Foto