Türkiye Cumhuriyetiniñ parlament delegatsiyası Qırımda

Все новости
07 nisan 2013 yıl 15:12

  Aprel 6 künü Ukrainağa resmiy ziyaret çerçivesinde Türkiye Cumhuriyeti dört parlament siyasiy partiyalarınıñ deputatlarından ibaret Türkiye Büyük Millet Meclisiniñ başqanı Cemil Çiçek yolbaşçılığındaki delegatsiya Qırımda bulundı.

  Şu künniñ özünde Türkiye Büyük Millet Meclisiniñ başqanı Cemil Çiçek yolbaşçılığındaki delegatsiya Qırım Yuqarı Şurası, Ukraina Prezidentiniñ Qırımdaki daimiy temsilciligi ve Qırımtatar halqı Meclisini ziyaret etip, Qırım Yuqarı Şurasınıñ reisi Vladimir Konstantinov, Ukraina Prezidentiniñ Qırımdaki daimiy temsilcisi Viktor Plakida ve Qırımtatar halqı Meclisiniñ reisi Mustafa Cemilevnen körüşti.

  Ukraina Prezidentiniñ Qırımdaki daimiy temsilciliginde olğan körüşüvde Meclis reisi Mustafa Cemilev ve onıñ birinci muavini Refat Çubarov da iştirak ettiler. Qırımtatar halqı Meclisinde Türkiye Büyük Millet Meclisiniñ Başqanı Cemil Çiçeknen beraber kelgen Türkiye Cumhuriyetiniñ Ukrainadaki Elçisi Mehmet Samsar, Büyük Millet Meclisiniñ milletvekilleri Mustafa Elitaş, Mehmet Erdogan, Kazima Kurt, Lütfi Türkkan, Hüsamettin Zenderlioglu, Türkiyeniñ Odessadaki Baş konsulı Hüsein Erganini Qırımtatar halqı Meclisiniñ reisi Mustafa Cemilev, onıñ birinci muavini Refat Çubarov, muavini Remzi İlyasov ve Qırım musulmanlarınıñ müftisi hacı Emirali Ablayev qarşılap aldılar.

  Mecliske kirişte ürmetli musafirlerni ellerinde Ukraina, Türkiye ve qırımtatar milliy bayraqlarnı tutqan qırımtatar cemaatçılığınıñ vekilleri qarşıladılar. Körüşüv devamında Mustafa Cemilev Büyük Millet Meclisiniñ başqanı Cemitl Çiçek ve onıñ parlamentteki meslekdeşleri yüzünde Ukraina ile işbirlik qurğanı ve qırımtatar halqına Vatanda yerleşmesinde yardım etkeni içün Türkiye Cumhuriyetine büyük teşekkürlerini bildirdi. Bu esnada Mustafa Cemilev Halqara forum keçirüvde Qırımtatar halqı Meclisiniñ teşebbüsine qoltutqan Türkiyeniñ destegini ayrıca qayd etti.

  "İçtimaiy ve iqtisadiy zorluqlarğa baqmadan qırımtatar halqı milliy özgünligini, tili, medeniyeti ve ananelerini qorçalav ve saqlap qaluvnı eñ müim vazifesi dep bile", - dedi Mustafa Cemilev türkiyeli nufuzlı musafirlerge.

  Öz nevbetinde Cemil Çiçek bundan evel Ukraina devleti yolbaşçılarınen olğan resmiy körüşüvlerde aytqan sözleri yani Ukraianada eñ yaqın vaqıtta Halqara forum keçirmek zarurlığı, bunıñ kibi de qırımtatar halqı ve sürgün etilgen diger milletlerniñ aqlarını tiklegen qanunlarnıñ öz vaqtında qabul etilmesiniñ müimligini seslendirgenini tasdiqladı.

  Türkiye Büyük Millet Meclisi Reisiniñ söylegenine köre Ukraina ve Türkiye arasında qomşucılıq munasebetlerni kenişletmek ve pekitmek siyaseti çerçivesinde Ukraina ile elde etilgen añlaşmalar boyunca Türkiye kelecekte de Qırımda qırımtatar halqınıñ inkişafına siltem bergen sotsial ve medeniy programmalarnı amelge keçirmekni devam etecek.

  İş körüşüvleriniñ neticesinde Türkiye Büyük Millet Meclisiniñ Başqanı Cemil Çiçek Qırımtatar halqı Meclisiniñ reisi ve Türkiye parlamenti vekillerinen birlikte Qırımnıñ tarihiy paytahtı Bağçasaraynı ziyaret etip, şeerniñ tarihiy yadikârlıqlarınen tanış oldı.

  Hansaray boylap kezintiden soñ nufuzlı musafirler ve qırımtatar cemaatçılığınıñ vekilleri Hancamide namaz qıldılar.

  Bağçasaray ziyaretinden soñ Türkiye Büyük Millet Meclisiniñ Başqanı Cemil Çiçek Qırımtatar halqı Meclisiniñ reisi ve Türkiye parlamenti vekilleri Aqyarğa yol aldılar ve anda türk askerleriniñ aniti yanında 1853-1856 seneleri Qırım cenkinde elâk olğan türkiyelilerniñ ruhuna dua oqudılar.

  Şu künü Türkiye delegatsiyası Belbek ava limanından Türkiyege qayttı.

 

www.qtmm.org malümatlarına esaslanıp

Foto