Kiyevde "Qırım.Baar.Navrez" sergisi açıldı

Все новости
21 mart 2013 yıl 11:46

 

  Çarşenbe kunü, martnıñ 20-de, Kiyevdeki Bogdan ve Varvara Hanenko adına Milliy sanat Muzeyinde "Qırım.Baar.Navrez" sergisiniñ tantanalı açılış tedbiri otkerildi.

  Sergi nezaretçisi, "Qırım uslübi" leyhasınıñ azası, dekorativ-ameliy sanat ustası, ressam Mamut Çurlu musafirlerni selâmladı. O,muzey ziyaretçilerine taqdim etilgen işlerniñ er bir ustasını qayd etti. Olarnıñ arasında Rustem Skibin, Ayder Asanov, EldarGuseynov, Ayder Abibullayev, Elmira Seytametova, Elmira Asanova, em de Zera Ablâzisova, Refat Kurtveliyev kibi yaş qırımtatar ustaları ve başqaları bar.

  "Kiyevdeki qırımtatarlar cemiyeti" adından teşkilât Yolbaşçısı Aslan Ömer Qırımlı ve Medeniyet İnkişafı Komitetiniñ Yolbaşçısı Femi Mustafayev çıqışta bulundılar. Olar unikal qırımtatar medeniyeti ve ananelerini saqlap qalması ve populârlaştıruvı içünboyle tedbirlerniñ emiyetini ve olarğa qol tutuv zaruriyetini qayd ettiler.

  Sergi tek qırımtatarlar içün degil de, qırımtatar halqı medeniyetini yahşı bilmege aves etkenler içün de unikal ve meraqlı olacaqtır. Ekspozitsiyada çeşit-türlü malzeme ve farqlı-farqlı tehnik usullar ile yapılğan eşyalar taqdim etile. Sergi musafirleri nağışnıñ uç çeşiti, kilim ustalığı, keramikanıñ bir qaç çeşiti, quyumcı ve demircilerniñ madenden yapılgan malları, ağaç ve qabaqtan mahsullar, çini ve camustünde resimler, milliy urba ve qoqlalar, kiyizden yapılğan eserlernen tanış ola bileler.

  Paytahtnıñ sakin ve musafirleri sergini Bogdan ve Varvara Hanenko adına Milliy sanat Müzeyinde mayısnıñ 13-e qadar ziyaret ete bileler.

 

Cemiyetniñ matbuat merkezi

Foto