Kiyevde qırımtatar halqı Qurultayı delegatlarınıñ saylavları olıp keçti

Все новости
26 mayıs 2013 yıl 10:54

 

  Mayıs 25 kunü Kiyevde qırımtatar halqı VI çağırılış Qurultayı delegatlarınıñ saylavları keçirildi. Saylav bolügi saat 8-de çalışıp başladı.

  Saylavlar ketişatını halqara nezaretçiler kozettiler - Commitee For Open Democracy, Halqara Cumhuriyet İnstitutından (IRI) ve Ukrainada Amerika Qoşma Ştatları Elçihanesiniñ ekinci kâtibi Stiven Peyc, em de namzet kostergenler ve cemaat teşkilâtlar ve olarnıñ bloklarından nezaretçiler.

  Saylavlar neticelerine binaen, №45 bir mandatlı saylav bolüginde (Kiyev ş. ve Kiyev vilâyeti) reylerniñ ekseriyetini alıp, qırımtatar halqı VI çağırılış Qurultayınıñ delegatı olaraq Kiyevdeki qırımtatarlar cemiyetiniñ yolbaşçısı Aslan OMER KIRIMLI saylandı. O, reylerniñ 80% qazandı.

  Proportsional sistema boyunca işbu okrugda reylerniñ 29% qazanıp, "Bizim Qırım" Halqara Cemaat Teşkilâtı ğalebeni elde etti. "Milliy Haq" saylav birleşmesi reylerniñ 19% qazanıp, ekinci yer aldı. Halqara nezaretçiler, saylav ketişatı yüksek seviyede keçirildi ve bir de-bir hatalar olmadı, dep qayd ettiler.

  Hatırlatamız, qırımtatar halqı Qurultayı delegatlarınıñ saylavları yañı saylav sistema boyunca ve umumiy, bir, doğru saylav aqqı esasında gizli rey berüv olaraq keçirile.

  Saylavlar qarışıq (majoritar-proportsional) sistema boyunca keçirile: 200 delegat majoritar sistema boyunca reylerniñ çoqluğınen çoq mandatlı saylav bölüklerinde saylanacaq; 50 delegat — çoq mandatlı yekâne saylav dairesinden proportsional sistema boyunca qırımtatar cemaat ve siyasiy teşkilâtlar ve olarnıñ bloklarından berilgen saylav cedvellerine köre saylanacaq.

 

"Kiyevdeki qırımtatarlar cemiyeti" CT matbuat hızmeti

Foto