Refat Çubarov Qırımtatar Milliy Meclisiniñ Reisi vekâletini qabul etti

Все новости
01 kasım 2013 yıl 18:53
  Bugün, noyabr 1-de, Bağçasarayda qırımtatar halqı Meclisiniñ yañı saylanğan Reisi ve azalarınıñ öz vazifelerine kirişmesiniñ tantanalı merasimi olıp keçti.
 
 
  Tedbirde Meclisniñ sabıq Reisi Mustafa Cemilev, Qırımtatar Milliy Meclisiniñ Reisi Refat Çubarov, regional meclis vekilleri, medeniyet erbapları, qırımtatar halqı milliy areketiniñ veteranları iştirak ettiler.
Tedbirniñ resmiy qısmı başlamazdan evel merasim iştirakçileri Hancamide cuma namazını qılıp, Hanlar qabristanında dua oqudılar.
  Tantanalı merasim milliy marş icrasınen başlandı. 
  Meclisniñ sabıq Reisi Mustafa Cemilev çıqışta bulunır eken, Meclisniñ yañı erkânına qırımtatar halqına hızmet etüv işinde muvafaqiyetler tilep, Refat Çubarovğa milliy bayraq ve vesiqalarnı berdi.
 
  Qırım Müftisi Hacı Emirali Ablayev Meclisniñ yañı Yolbaşçısına Quran-ı Kerimni taqdim etti.
 
  Qırımtatar Milliy Meclisiniñ Reisi Refat Çubarov, öz nevbetinde, "Ant etem, millet içün çalışmağa söz berem" dep yemin etti. Bundan soñra Meclisniñ yañı saylanğan 32 azası da ant sözlerini seslendirdi.
  Resmiy qısımdan soñ tedbir iştirakçileri ve musafirleri içün qırımtatar sanatkârları çıqışta bulundılar.
Tantanalı merasimden soñ jurnalistler içün keçirilgen brifingde Refat Çubarov, Mecliste bir de-bir bölünüv yoq, dep bildirdi.
  Hatırlatamız, oktâbr 26-27 künleri Aqmescitte Qırımtatar halqı VI çağırılış Qurultayınıñ birinci sessiyası ötkerildi. Gizli rey berüv neticesinde Qırımtatar Milliy Meclisiniñ yañı Reisi ve azaları saylandı. Meclisniñ yañı saylanğan azaları arasında — Kiyevdeki qırımtatarlar Cemiyetiniñ Yolbaşçısı Aslan ÖMER QIRIMLI. 
 
 
"Kiyevdeki qırımtatarlar cemiyeti" CT matbuat hızmeti

Foto