Meclis reisiniñ Türkiye Cumhuriyetine ziyareti

Все новости
24 aralık 2011 yıl 19:35

 

2011 senesi dekabr 22-de Ukraina Prezidenti Viktor Yanukoviç bir künlük resmiy ziyaretnen Türkiyede bulundı. Prezidentnen beraber Ukraina Tışqı işler naziri K.Grişçenko, bir qaç saa nazirleri, bunıñ kibi de Qırım baş naziri A.Mogilev ve Qırımtatar halqı Meclisiniñ reisi M.Cemilev de oldılar.

Ziyaret devamında Türkiye Cumhuriyetiniñ Prezidenti Abdulla Gül, baş nazir R. T.Erdogan ile körüşüvler ötkerildi, eki devlet arasında iqtisadiy emekdaşlıq ve eyi qomşucılıq munasebetleriniñ inkişafına doğrultılğan bir sıra añlaşmalar imzalandı.

Bir çoq izaatçılarnıñ fikrince ziyaretniñ eñ büyük yutuğı – Ukraina ve Türkiye arasında vizasız rejimniñ tesis etilmesidir. Körüşüvlerde qırımtatarlarnen bağlı meseleler de muzakere etildi.

Ukraina Prezidenti V. Yanukoviçnen beraber matbuat konferentsiyasında çıqışta bulunğan Türkiye baş naziri Erdoğan böyle dedi: "Bu körüşüvde biz qırımtatarlarnıñ vaziyetine dair meselelerni de muzakere etip, qırımtatarlarnıñ iqtisadiy, siyasiy ve medeniy meseleleriniñ çezimine doğrultılğan tedbirlerni baqıp çıqtıq. TİKA al-azırğace bu problemlerniñ çezimine tahminen 22 million dollar sarf etti. TİKAnıñ Kiyevde ofisini açmaq qararı munasebetinen men Yanukoviçnen şu yardımnı daa da çoqlaştırmaq istiqballerini muzakere ettim".

 Bunıñ kibi de, Meclis reisi M. Cemilev Avropa Keñeşi Parlament Assambleyasınıñ Prezidenti M.Çavuşoglu ve Türkiye Tışqı işler naziri Ahmet Davutoglu ile körüşti.

Türkiye baş naziriniñ qonağında Ukraina Prezidentiniñ şerefine berilgen resmiy yemekte V. Yanukoviç musafirlerni sofra başına yerleştirüv tertibine diqqat etip, yarı şaqa tarzında: "Asılında Mustafa ağanı ve Mogilövnı yan-yanaşa oturtmaq kerek edi", dedi. Salonda bulunğanlar arasında bir çoqları qırımtatarlarnıñ A. Mogilöv ile keçmişteki munasebetlerinden haberdar olğanlarından, bu sözler olarnı bayağı şeñlendirdi.

 

Milliy Meclis kâtibiyeti

Foto