Riza Fazılnıñ "Amet-Han — Qırımnıñ ğururı!.." kitabınıñ taqdim merasimi

Все новости
23 ocak 2013 yıl 18:43

   Yanvarniñ 23-de Aqmescit şeeri Qırım müendislik ve pedagogika universitetinde Riza Fazılnıñ "Amet-Han — Qırımnıñ ğururı. Alupkanıñ şanlı oğlu halqnıñ añında" kitabı taqdim etildi.

   Kitap eñ evelâ Ukraina Yuqarı Şurası deputatları ve Qırım Yuqarı Şurasınıñ deputatları içün neşir etildi. Olarnıñ ögünde bir sual tura: Qırımnıñ belli oğlu, Sovetler Birliginiñ eki defa Qaramanı, SSCBniñ Şerefli uçucı-sınavcısı, SSCB Devlet mukâfatınıñ laureatı, bir çoq orden ve medallerniñ saibi Amet-Han Sultan, "Aqmescit" halqara ava limanına "Amet-Han Sultan adına Aqmescit halqara ava limanı" adını berilmesine lâyıqmı.

   Mevzunı devam eter ekenmiz, şunı qayd etmeli ki, "Vatan qanatları" teşebbüs gruppası Sovetler Birliginiñ eki defa qaramanı Amet-Han Sultan eykelini azırlamaq ve Kirovograd şeerine ketirmek içün para toplamağa başlay. Vatandaşımıznıñ abidesini Devlet üçüş akademiyasınıñ territoriyasında tiklep, gençlerni vatanperverlik ruhta terbiyelemek, em de Ukraina ve ondan tış memleketlerde Amet-Han Sultannıñ ileri populârligini kefil etmege mümkün.

   Qırımtatarlarnıñ cemiyeti işbu teşebbüske qol tuta ve "Vatan qanatları" teşebbüs gruppası ile beraber tarihımızğa pervasız qalmağan er bir adamnı Amet-Han Sultan eykeliniñ azırlamasına öz issesini qoşmağa celp ete.

 

Cemiyet matbuat merkezi

Foto