Bayram namazı ögünden Qırımda daa bir camini yaqtılar

Все новости
15 ekim 2013 yıl 17:57
  2013 senesi oktâbr 15 künü eñ büyük musulman bayramlarınıñ biri olğan Qurban bayramı künü saba saat 6-da Qurman rayonınıñ Qarasan köyünde daa bir camini yaqtılar.
 
  Bu aqta Meclis Kâtibiyetiniñ başı Zair Smedlâyevniñ sözlerine esaslanğan 15minut.org saytı bildire.
 
  Soñki üç kün içinde bu endi böyle ekinci adisedir. Hatırlatamız ki, oktâbr 13 aqşam Saq şeerinde "Yañı Cami" musulman cemiyetiniñ camisi yaqıldı. Qırım militsiyası yandıruv versiyasını da köz ögüne ala.
 
  Meclis Kâtibiyetiniñ başı Zair Smedlâyevniñ sözlerine köre Qarasandaki cami oktâbr 15 künü tañda yanğan.
 
  "Yanğın namazğa bir saat qalğanda yüz berdi. Allağa şükürler olsun ki, bütünleyin yanmadı, amma ateş muqaddes kitaplarnı yoq etti", - dedi Smedlâyev.
 
 
  Öz nevbetinde Meclis reisiniñ birinci muavini Refat Çubarovnıñ haber etkenine köre, kitaplarnıñ bir qısmı, hocalıq eşyaları yanğan. İbadethaneni biraz tamirlemek, tahtalarnı deñiştirmek kerek olacaq.
 
 
  Zair Smedlâyevniñ fikrince üç künde eki caminiñ yaqılması sadece tesaduf olabilmez. "Zanımca, mında Saqta yanğın çıqarğan teşkilâtnıñ "filialı" areket etken. Bu balalar şovinistik vereqalarnı mında defalarca tarqatıp yürdiler. Eñ deşetlisi şunda ki yanğın musulmanlarnıñ büyük Qurban bayramı arfesinde yapıldı", - qayd etti Smedlâyev.
 
  Al-azırda yanğın olğan yerde taqiqat-operativ gruppa çalışmaqta.
 
 
qtmm.org malümatlarına esaslanıp
 
 

Foto