Mustafa Cemilev kommunistik rejimi üzerinde mahkemede iştirak etti

Все новости
12 kasım 2012 yıl 10:03

 

     Noyabrniñ 8-de Berlinde "Ştazi" Almaniya Demokratik Cumhuriyetiniñ  milliy telükesizlik hızmetiniñ apshane-müzeyi binasında Avropa hatırası ve insafınıñ Platforması azalarınıñ "Avropadaki totalitarizm" mevzusında toplaşuvı öz işini başladı. Toplaşuvda qırımtatar halqı Meclisiniñ temsilcileri de iştirak ettiler. Bunı Meclisniñ matbuat-hızmeti bildire.

     Platforma faaliyeti ve teşkilâtnıñ yañı azalarınıñ saylavınen bağlı olğan, meseleler muzakere etilgen soñ, ХХ asırda kommunistik rejiminiñ cinayetlerini ögrenmek içün areket etecek, iş gruppalar teşkil etildi.

     Qırımtatar halqı Meclisi 2012 senesi iyün ayından başlap  Platformanıñ azası olaraq kommunistik rejimi üzerinde mahkemeniñ İş gruppasına kirdi. Gruppa erkânına Almaniya, Romaniya, Litva, Latviya ve Avropa Birligi diger devletlerindeki cemaat teşkilâtlarınıñ vekilleri kirdiler.

     Meclis Yolbaşçısı, İş gruppanıñ azaları ögünde çıqışta bulunır eken, şunı qayd etti: "Kommunistik rejimi, Sovet birligi Kommunistik Firqası,  onıñ adamlarğa kin besleyici mefküresi üzerinde mahkeme — alicenap bir maqsat, insaniyet tarihında bu deşetli ve alçaq rejiminiñ çoq millionlı qurbanlarına sayğı kösterüv, bu mahkemeniñ ötkerilmemesi demokratik esasları ve sabıq Sovet birligi açıq cemiyetiniñ ilerilemesini mürekkepleştirecek!".

     Şunı da qayd etmeli ki, toplaşuv, ХХ asırda kommunistik rejiminiñ dağılması olaraq belli olğan, Berlin divarı yıqıluvınıñ 23 yıllığı qayd etilgen künleri ötkerilmekte.

     2012 senesi noyabrniñ 9-da Avropa hatırası ve insafınıñ Platforması şurası azalarınıñ toplaşuvı Berlinde işini devam ettirecek.

 

Meclis matbuat merkezi

Foto