Mayıs 18 kunü mitingni Temsilciler Şurası degil de, Meclis keçirecek

Все новости
13 nisan 2013 yıl 14:23

  Qırımtatar halqı Meclisi reisiniñ birinci muavini Refat Çubarov, mayısnıñ 18-de matem mitingni qırımtatar halqı Meclisi otkerecek, dep añlattı. Bunı o, QHA informatsion agentilgine bildirdi.

  Qayd etmeli ki, bundan evel Ukraina prezidenti yanında qırımtatar halqınıñ Temsilcileri Şurasınıñ reis muavini Vasvi Abduraimov QHAğa boyle dedi, mayıs 18 kunü mitingni Temsilciler Şurası keçirecek.

  Temsilciler Şurası Anatoliy Mogilövnıñ yolbaşçılığı altında olğan Sürgünliknen bağlı matem mitinglerni azırlağan ve keçirgen Teşkiliy komitetke mayısnıñ 18-de Aqmescitniñ merkeziy meydanında em Meclis, em de oña qarşı çıqqan siyasiy ve cemaat teşkilâtlarınıñ iştiragi ile bir miting otkermek muracaatınen bulunacaq.

  Meclis liderlerinden biri kene de ayttı, er bir matem tedbirni qırımtatar halqınıñ Meclisi keçirecek.

  "Açıq-aydın qarar, açıq-aydın bir añlav bar. Qırım Muhtar Cumhuriyeti Nazirler Şurasınıñ yanında olğan Teşkiliy komitetniñ toplaşuvında boyle ayttılar, mayıs 17 kunü butün kutleviy tedbirler, mayıs 18 kunü matem tedbirler, şu cumleden Butünqırım matem mitingi, keçken senelerde olğanı kibi keçirilecek. Mezkür tedbirlerni qırımtatar halqınıñ Meclisi keçirecek", - dedi R. Çubarov.

  Hatırlatamız, qırımtatar halqı Meclisi Ukraina prezidenti yanında Temsilciler Şurasınıñ azası olmağa red etti. Çünki Meclis azalarınıñ fikirince, halq menfaatlarını akimiyet tarafından tayinlengenler degil de, halq tarafından saylanğan qırımtatarlar temsil etmeli.

  Malümat. Qırımtatar halqınıñ Meclisi cemaat teşkilâtı sayılmay. Milliy Meclis - er beş yılda bir kere umumiy saylavlar neticesinde tayinlengen qırımtatarlarnıñ milliy Qurultayınıñ (parlamentiniñ) icra organıdır.

 

 

www.qirimtatar.org malümatlarına esaslanıp

Foto