Leonid Kuçma: Akimiyet qırımtatarlarnıñ tamırları Qırımda olğanını añlamaq kerek, ve er angi vaziyette halqqa qoltutmaq imkânını tapmaq mümkün

Все новости
14 eylül 2012 yıl 12:32

 

      2012 senesi sentâbr 12-de Qırım müendislik-pedagogika universitetinde "Leonid Kuçmanıñ "Ukraina" prezidentlik fondu" hayriye teşkilâtı istidatlı studentlerge adı yazılı stipendiyalarnı taqdim etti.  
                                      
      Stipendiyalarnı saiplerine şahsen bermek içün QMPUğa fond qurucısı, Ukrainanıñ ekinci prezidenti Leonid Kuçma teşrif buyurdı. Tantanalı merasimde Qırımtatar halqı Meclisiniñ reisi, Ukraina halq deputatı Mustafa Cemilev, Ukraina Prezidentiniñ Qırımdaki daimiy temsilcisi Viktor Plakida, Qırım Nazirler şurası reisiniñ muavini Aziz Abdullayev, Meclis reisiniñ muavini Remzi İlyasov, Cumhuriyet Milletler komiteti reisiniñ muavini Emine Avamileva, Ukraina Prezidentiniñ Qırımdaki daimiy temsilcisiniñ muavini İbraim Mamutov iştirak ettiler.

     MPU rektorı Fevzi Yaqubov professorlar ve ocalar, bunıñ kibi de talebelerniñ de adından Leonid Kuçmağa universitet açılğan künden berli muntazam sürette köstergen yardımı içün teşekkür bildirdi.

     "Leonid Daniloviç, men bellesem, Ukraina tarihında siziñ adıñız altın ariflernen yazılır. Men Ukrainada sizni eñ ziyade sevgen kollektivlerniñ er angisini yarışqa davet etebilem. Ve eminim ki, kimse bizden ögde olamaz, çünki Sizni eñ ziyade QMPUda seveler!", - dedi Fevzi Yaqubov.

     Rektornıñ kiriş sözünden soñ stipendiyalarnı taqdim etmek içün sanağa Leonid Kuçma davet etildi. Bu sene stipendiyanen iqtisadiyat fakulteti 3-nci kurs talebesi Sevilâ Ablayeva, kene şu fakultetniñ 5-nci kurs studenti Öleg Önişçük, qırımtatar ve türk filologiyası 4-nci kurs studenti Naciye Rustemova , sanat fakultetiniñ 3-nci kurs talebesi Mustafa Çabanov, tarih-filologiya fakulteti 2-nci kurs studenti Anife Qarabiber taqdirlendiler.

     Tantanalı taqdimden soñ QMPUnıñ icadiy taqımları kontsert programmasını numayış ettiler.

     "Kelecek yılda bizim fondumıznıñ meydanğa ketirilgenine 20 yıl tolacaq. Eger davet etseñiz, mıtlaqa kelirim, - dedi Leonid Kuçma. – Zanımca, Ukraina bu oquv yurtunen ğururlanmaq kerek" Bundan da ğayrı Leonid Kuçma stipendiyanen taqdirlengen studentlerniñ sayısını arttırmaq niyetini bildirdi.

     Ukrainanıñ sabıq Prezidenti devlet yolbaşçısı olğan vaqtında bütün problemlerni, şu cümleden sürgün etilgen qırımtatar halqınıñ da problemlerini çezmege tırışqanını qayd etti. "O devirde Sovetler Birliginiñ bütün ülkelerinden insanlar yurtlarına qaytqanlarını, em de professional, aliy malümatlı, bilgili, oqumış adamlar, professorlar ve alimler qaytqanlarını, lâkin öz bilgilerinen paylaşmaq imkânından marum olğanlarını pek yahşı añlay edim. Eñ büyük problem şunda edi!", - dedi L. Kuçma.

     "Qırımtatarlar öz topraqlarında Vatanlarınıñ aqiqiy saipleri kibi yaşamaq kerekler. Bu eñ müimi. Akimiyet qırımtatarlarnıñ tamırları Qırımda olğanını añlamaq kerek, ve er angi vaziyette halqqa qoltutmaq imkânını tapmaq mümkün. Bunı ne derecede tez añlasalar, problemler de o qadar tez eksilir", - dep qayd etti Leonid Kuçma.

 

Milliy Meclis matbuat merkezi. 

Foto