Acı Emirali Ablayev Qırım musulmanları müftisi olaraq saylandı

Все новости
30 eylül 2013 yıl 19:16

  2013 senesi sentâbr 28-de Aqmescitte Qırımtatar muzıkalı drama teatriniñ binasında ötkerilgen Qırım musulmanları 5-nci qurultayında bütün Qırımdan 365 delegattan 311 neferi iştirak etti.

  Qurultay kün tertibiniñ esas meselelerinden biri Qırım musulmanlarınıñ müftisini ve Teftiş komissiyasını saylav edi.
Qurultay öz işini devlet ve milliy gimni ve duadan başlandı.

  Soñra Qurultay prezidiumı saylanıp, oña Qırım musulmanlarınıñ müftisi acı Emirali Ablayev, onıñ muavinleri Ayder İsmailov ve Enver Nogaşev, bunıñ kibi de Meclis reisiniñ birinci muavini Refat Çubarov kirdiler.

  Resmiy açılıştan soñ Meclis reisiniñ birinci muavini Refat Çubarov Meclis reisi Mustafa Cemilevniñ Qırım musulmanları qurultayı başlanması munasebetinen hayırlavını bildirdi.

  Bunıñ kibi de Ukraina dindarları, Türkiye Cumhuriyeti Din işleri boyunca idareniñ vekili Mehmet Emir Ozavşar, Ukraina Prezidenti Qırımdaki daimiy temsilcisiniñ yardımcısı İbraim Mamutov ve Qırım Baş naziriniñ muavini Aziz Abldullayev da hayırlav sözlerinen çıqışta bulundılar.
 

  Meclis reisiniñ birinci muavini Refat Çubarov Qırım imamlarınıñ işine ve professionallığına yüksek qıymet kesti. "Yapqan işiñiz içün sizlergne teşekkür bildirmek isteyim, - dedi R. Çubarov. O, Qurultay delegatlarınıñ diqqatını yerli din cemiyetleri Müftiliknen ve maalliy milliy idare organlarınen bir iş tutqanlarında qırımtatar halqınıñ ömürine dair bir çoq meselelerniñ çezilmesine irişmek mümkünligine celp etti.

  Qurultay devamında Qırım musulmanlarınıñ müftisi acı Emirali Ablayev esabat maruzasınen çıqışta bulunıp, delegatlarğa idareniñ beş yıl devamında yapqan faaliyetini tarif etti.


  Müftiy ve Teftiş komissiyanıñ çıqışlarından soñ kelecek beş yılğa Müftiy saylav meselesi qoyuldı. Qurultay delegatları Müftiy vazifesine tek bir namzetni Qırım musulmanlarınıñ müftisi acı Emirali Ablayevni kösterdiler.

  Müftiy seçimleri açıq rejimde ötkerildi. Rey berüv neticelerine köre 311 delegat birağızdan Qıprım müftiysi olaraq acı Emirali Ablayevni saylap, soñra Teftiş komissiyanıñ erkânını tekmillediler.

  Qırım musulmanlarınıñ 5-nci Qurultayı duanen yekünlendi.

 

qtmm.org malümatlarına esaslanıp

 

 

 

Foto