Meclis Yolbaşçısı Mustafa Cemilevniñ fikirince, 2012 senesi dekabrniñ 1-de gece yüz bergen vaqialarğa akimiyet bağlı ola bile

Все новости
03 aralık 2012 yıl 19:36

 

     Qırımtatar milliy Meclis Yolbaşçısı, Ukraina halq deputatı Mustafa Cemilev, bir gecede yüz bergen, Aqmescitte Cuma Cami qurulacaq yerde qaravul vagonçıqnıñ ateşke berüvini ve qırımtatarlarnıñ "narazılıq tarlaları"nda 100 muvaqqat evçikniñ yıqtırılmasını bir-birinen bağlay.

     Bunıñnen beraber, o, vaqiağa akimiyetniñ alâqasını da red etmedi. Bunı Meclis yolbaşçısı "Крым.Комментарии" saytına berilgen tefsirde bildirdi.

     "Doğrudan-doğru aytıp olamayıq, amma, bağlı olğanlarına, oşay. Birinci vaqiağa akimiyet bağlı olmasa da, ekinci vaqiada olar iştirak ettiler. Çünki kazaklar kelmezden evel, anda militsiya kelip, adamlar bar ya da yoq — soray edi. Soñra militsiyanıñ imayesi altında, gece saat 2-de, özüni kazaklar kibi tanıtqan, cinayetçiler keldiler. Ve, bundan da ğayrı, olar anda er şeyni yıqıp qaçqan soñ, qırımtatarlar kelmesin ve kazaklarnen çatışmasın dep, apansızdan militsiya hadimleri keldiler", - dey o.

     Cemilevniñ sözlerine köre, vaqianıñ akimiyetnen añlaşıp keçirilüvinini vekâletli organlar tarafından areketsizlik tasdiqlaycaq.

     "Bu kimge kerek? Akimiyet ne istey? Deyler ki, marginallardan birisi yerli deputat olmağa istey ve rus tilli, şovinistik fikirleri olğan saylaycılar arasında özüni qaraman olaraq köstermege istey", - dey Cemilev. - Eñ yahşı köstergiç quvet organlarnıñ areketleri ya da areketsizligi olacaqtır. Bu ücümlar cinaiy kodeksiniñ uyğun bir maddelerge ait. Bu insanlar cinaiy mesülietke çekilmeseler — demek er şey akimiyetnen uyğunlaştırıldı. Aksenov (Qırım Yuqarı Şurasınıñ deputatı, "Russkoye Yedinstvo" firqasınıñ yolbaşçısı — muar.) kütleviy haber vastalarına bu aydut ücümlarını öz üstüne alğanını bildire — bu ise akimiyetnen kelişkenini delil ete.

     Hatırlatamız, noyabr 30-dan dekabr 1-ne keçer gecesi Aqmescit rayonnıñ Molodöjnoye qasabası yanındaki "narazılıq tarlası"nda qırımtatarlarnıñ inşaatları yıqtırıldı, Aqmescitte ise bellisiz şahıslar, Büyük Cuma Cami qurulacaq yerde vagonçıqqa patlayıcı maddelernen tolu şişelerni atıp, qaravulğa ücüm ettiler.

Meclis matbuat merkezi

Foto