Meclis reisi Mustafa Cemilev Türkiye Cumhuriyeti Şimaliy Qıbrızdaki Kireniya universiteti qurucılığı ve Yaqın Şarq universiteti camisiniñ temelini qoyuvda iştirak ete

Все новости
28 eylül 2013 yıl 22:38

  Meclis reisi Mustafa Cemilev sentâbr 26-29 künleri Türkiye Cumhuriyeti Şimaliy Qıbrızda bulunmaqta.

  Yaqın Şarq universitetiniñ rektorı Suat Günselniñ daveti ile Meclis reisi Mustafa Cemilev ve Kiyevdeki qırımtatar cemiyetiniñ reisi Aslan Ömer Qırımlı ve 5-ncı çağırılış Qurultaynıñ delegatı, Mustafa Cemilevniñ mesleatçısı Rustem Ümerov Türkiye Cumhuriyeti Şimaliy Qıbrızdaki Kireniy universiteti qurucılığı ve Yaqın Şarq universiteti camisiniñ temeli qoyulmasına bağışlanğan tantanalı tedbirde iştirak eteler.

  Sentâbr 27-de olğan tantanalı tedbirde Türkiyeniñ baş nazir muavini Beşir Atalay, Türkiye Odalar ve Borsalar Birliği başkanı Rifat Hisarcıklı oglu, Türkiye Cumhuriyeti Şimaliy Qıbrız parlamentiniñ azaları, TÜRKSOY Baş kâtibi Düsen Kaseinov, universitetniñ professor ve ocaları erkânı, studentler bulundılar. Yaqın Şarq universiteti yolbaşçılarınıñ aytqanına köre, universitet kampuslarınıñ birinde qurulacaq bu cami Qıbrız camileri içinde eñ büyügi olacaq.

 

  "Yaqın Şarq universitetiniñ camisi bir kereden 10 biñ adamnı sığdırabilecek, - dep haber ete Universitetnıñ matbuat hızmeti. Caminiñ leyhasında altı minare közde tutulıp, dörtüniñ yüksekligi 72 metr, üç şarafı olacaq, Eki minare ise 54 metr olıp, eki şarafı olacaq. Pencereleri osmanlı mimarlıqnıñ şekilinde olması közde tutula.

  Aynı şu künü Meclis reisi Mustafa Cemilev Kireniya universitetiniñ temel taşını qoyuvda da iştirak etti. Kireniya universiteti Kireniya şeerindeki yañı liman tarafında 6,5 gekter meydanda yerleşecek. Universitet kompleksi 5 fakultet, kütüphane, lektsiya ve konferentsiya salonları, memuriy bina, sport meydançıqlarından ibaret olacaq. Universitet binası Qıyurızda izini qaldırğan medeniyetlerniñ çizgilerini taşıycaq.

  Universitette zemaneviy fenlerden ders berilip, bu da universitet dizaynına öz tesirini keçirdi.

  Tantanalı tedbirlerden soñ Milliy Meclis reisi ve Kiyevdeki qırımtatar cemiyetiniñ reisi Aslan Ömer Qırımlı, Meclis reisiniñ mesleatçısı Rustem Ümerov içün Yaqın Şarq universiteti  ve onıñ çoqtan-çoq oquv korpusları boylap sefer teşkilâtlandırıldı.  Meclis reisine zemaneviy talaplarğa uyğun şekilde donatılğan oquv odaları, basseyn, universitetniñ şahsiy mülkü olğan antiqa  avtomobiller kollektsiyasını kösterdiler.

  Mustafa Cemilevniñ Qıbrızğa ziyareti şerefinde üyle yemegi berilip, onda  Türkiye Cumhuriyeti Şimaliy Qıbrız parlamentiniñ sabıq reisi Ersin Tatar, Yaqın Şarq universitetiniñ rektor yardımcısı Fahreddin Sadıkoğlu, bunıñ kibi de universitette tasil alğan qırımtatar studentleri de iştirak ettiler.
 
 
qtmm.org malümatlarına esaslanıp

Foto