"Armançıq"

Все новости
30 ocak 2013 yıl 04:52

 

  "Tezis" Aqmescit neşriyatı "Armançıq" balalar içün qırımtatar mecmuasınıñ beş sanını endi neşir etti.

  "Armançıq" - 5 yaşından 12 yaşına qadar balalar içün eglence-ögretici bir jurnaldır. "Bizim vazifemiz — em küçük, em de büyük balalar içün mecmuanı meraqlı yapmaqtır", - dep ayta "Tezis" neşriyat eviniñ müdiri Ediye Müslimova.

 Ediye hanım şunı qayd etti ki, qırımtatar bala mecmuasını meydanğa ketirmek ğayesini qırımtatar qadın-qızlar Ligasınıñ reisi Safinar Cemileva teklif etti. O, neşirniñ müşterisi olaraq  iştirak etti. Aynı zamanda, 10 yıl evelsi, "Ocaq" neşriyatı basmahanesiniñ muarriri olıp, Ediye hanım balalar içün "Armançıq" mecmuasını neşir etmege niyetlendi. O vaqıtta o, "Vidrocennâ" leyha boyunca 22 bala kitabını neşir etti. Bugünki künde mezkür ğaye böyle dülber meraqlı neşir şeklinde dünya yüzüni kördi.

  "Armançıq" mecmuası içün bizler renkli, parlaq cıltnı azırladıq, bir çoq resimlerni qoştıq. Jurnalnıñ mündericesi pek meraqlı, onıñ tili ise sade ve añlayışlıdır. Milliy neşirler parlaq, meraqlı ve yüksek seviyede azırlanıla bile dep, bunı köstermege isteymiz", - ayta Ediye Müslimova.

  Mecmuağa Qırımnıñ er bir poçta bölüginde abune olmağa mümkün ya da Aqmescitte: Karla Libknehta soqağı 14/14 adresi boyunca satın almağa imkân bar.

 

Cemiyetniñ matbuat merkezi

Foto