Mart 8 künü — Balkar halqınıñ sürgünlik künü

Все новости
09 mart 2013 yıl 01:24

 

  Martnıñ 8 — Balkar halqına qarşı alıp barılğan siyasiy repressiyalar qurbanlarınıñ hatıra künüdir. Kabardino-Balkariya ve qomşu cumhuriyetlerde bu künleri er yıl matem tedbirleri keçirile.

  1944 senesi martnıñ 8-de balkarlar SSCB (SSSR) reberliginiñ qararınen sürgün etilgen ediler. Cemi 37713 insan sürgün etildi. Adamlarnı eki saat içinde evlerden çıqardılar. Sürgün etilgen balkarlarnıñ umumiy sayısından 52 fayıznı balalar teşkil ettiler, 30  fayıznı — qadınlar, 18 fayıznı — erkeklerdir: cenkten qaytqan saqatlar ve qartlardır. 18 kün içinde yolda oñaytsız vagonlarda açlıq, suvuq ve hastalıqlardan 562 insan elâk oldı. Bu deşetli vaqialar aqibetinde balkarlarnıñ 40% elâk oldı.

  Balkarlarnı kiçik gruppalarğa bölip, Orta Asiya ve Qazahistanda yerleştirdiler. Sürgünlikte 13 yıl devamında yaşağan halq vatanğa avdet oldı.

  Qırımtatarlar cemiyeti qardaş halqına taziyelerni bildire; yüreklerimizde qabaatsız elâk olğan adamlar içün hatıra ve acı daima yaşay!

 

 

Cemiyetniñ matbuat merkezi

Foto