Qırımtatarlar sürgünliginiñ 69 yıllığı munasebetinen ötkerilgen Bütünqırım matem mitinginde 40 biñden ziyade adam iştirak etti

Все новости
18 mayıs 2013 yıl 23:15

  Mayıs 18 künü Qırımtatarlar sürgünliginiñ 69 yıllığı munasebetinen ötkerilgen Bütünqırım matem mitinginde 40 biñden ziyade adam iştirak etti.

  Qırımtatarlar çoq yaşağan Qırım, Herson ve Zaporojye vilâyetlerinde mayıs 18 künü saba yerli matem mitingleri keçirilip, sürgünlik yerlerinde elâk olğanlarnıñ.

  Ruhuna dualar oquldı. Bundan da ğayrı, Ukrainanıñ Brüssel, Gaaga, Berlin, Vena, Parij, Varşava, Bernde ve Avropa Birligi azaları olğan diger devletlerde, bunıñ kibi de Türkiyeniñ Anqara ve İstanbul şeerlerindeki elçihaneleriniñ qarşısında qırımtatar halqı soyqırımı qurbanlarınıñ hatırasına bağışlanğan dualar oquldı.

  Sabadan hatıra taşları ve abidelerine çeçekler qoyuldı ve matem merasimleri keçirildi. Matem mitingi iştirakçileri demiröl vokzalı, Salğır bağçası. Zapadnaya avtostantsiyası, Pobeda caddesi ve M. Jukov mikrorayonından beş kolonna olıp Aqmescitniñ merkeziy meydanına keldiler.

  Bu künü "Qayğı ve birlik daqqası" vaqtında Kiyevde "Biz avropalılarmız" areketi iştirakçileri, "Ukrainada vatandaşlıq cemiyeti" halqara konferentsiyanıñ Ukraina ve Qırımnıñ çeşit yerlerinden kelgen 50-den ziyade iştirakçisi, qırımtatar halqınıñ çoqtan-çoq dostları birlikte ediler.

  Bütünqırım matem mitingini Meclis reisiniñ birinci muavini, Bütündünya qırımtatarlar kongressiniñ prezidenti Refat Çubarov açtı.

  Soñra Bütünqırım matem mitingi iştirakçileriniñ ögünde Ukraina Yuqarı Şurası İnsan, milliy azlıqlar aqları ve milletlerara munasebetler komitetiniñ başı Valeriy Patskan çıqışta bulundı. O onıñ reberligindeki komitet milliy mensüpligine köre sürgün etilgen insanlarnıñ aqlarını tiklev boyunca Qanunnıñ qabul etilmesi içün bütün imkânlarını işke qoyacağını işandırdı.

  Matem künü Qırımtatar halqınen göñüldeş olğanını çıqışta bulunğan Romaniya musulman türk-tatar demokratik birliginiñ reisi Celil Esercep, Bütündünya qırımtatarlapr kongressi İcra komitetiniñ azası Amet Varol, "Qırım" vaqufınıñ(Türkiye) başı Murtaza Essenqal, Qırım dernegi umumiy merkeziniñ baş kâtibi Deñiz Şahin, Ukoraina milliy cemiyetler kongressinini reisi, sovet dissidenti İolsif Zissels, Qırımtatar halqı milliy areketiniñ veteranı, sovet kamplarınıñ mahbüsi Ayşe Seytmuratova, "Udar" partiyasınıñ vekili, Ukraina halq deputatı Aleksandr Moçkov bildirdiler.

  Mayıs 18 künü Bütünqırım mitinginde "Svoboda" birleşmesinden Ukraina halq deputatı Eduard Leonov da çıqıştı bulundı. "Biz Allahnıñ nimeti olğan topraqnıñ saiplerimiz. Balalarımıznı nasıl terbiyeleycekmiz, devletni nasıl idare etecekmiz – bunı tek biz – qırımtatarlar ve ukrainler özümiz çezmek kerekmiz", - Eduard Leonov dedi.

  Bütünqırım mitingde çıqışta bulunğan Milliy Meclis reisi Mustafa Cemilev miting iştirakçilerine muracaat eterek keçken 2012 senesiniñ neticelerine yekün çekti ve qırımtatar halqınıñ taqdirine dair müim vaqialar aqqında ayttı. Meclis reisi qırımtatarlarnıñ aqları tiklenilmesi akimiyet mania olğanda daima halqnı bölmek oğrunda çalışacaq çeşit gruppalar ve siyasiy aqımlarnı meydanğa ketirip, olarğa destek berip kelmekte, dedi.

  Böyleliknen, bütün milliy areketni bastırmaq qıyın, amma onı zayıflaştırmaq, küçsüz yapmaqnıñ yol ve usulları bar. Bu ta Rusiye Qırımnı işğal etkeniniñ birinci künlerinden başlanıp, soñra sovetler devrinde ve teessüf ki, şimdiki zamanda, közetilmekte, - dedi Cemilev. – Ukraina mustaqilligi ilân etilgenden berli, 1994- 1995 senelerde "prezidentlik" yapqan Yuriy Meşkov devirde bile qırımtatarlarğa nisbeten böyle açıqçasına açıqtan-açıq provokatsion siyaset aoıp barılmağan edi. "Prezident" Yu. Meşkovnıñ karyerası nenen bitkenini bilemiz. Qırım baş naziri Anatoliy Mogilöv aynı böyle alğaı qalacağı şübesiz. Onıñ Qırım ükümetiniñ reisi olaraq çalışqan er künü – bu Qırımda stabillik ve barışıqlıqqa zarar ketire"

  Meclis reisi Mustafa Cemilev Qırım ükümetiniñ baş naziri Anatoliy Mogilöv vazifesinden boşatılmasını talap etkenini bildirip, Mogilövnıñ fesatçı, şovinistçesine faaliyeti prokuratura tarafından baqılmasını, siyasiy ve milliy sebepler boyunca işten aqsız boşatılğanlarnıñ ğayrıdan işke qaytarılmasını talap etti.

  Bundan soñ Meclis kâtibiyetiniñ başı Zair Smedlâyev mayıs 18 bütünqırım mitinginiñ iştirakçilerine Bütünqırım matem mitinginiñ Qararı leyhasını oqup eşittirdi.2013 senesi mayıs 18 Bütünqırım matem mitinginiñ 40 biñ iştirakçileri Qararnı qabul ettiler.

  “Kiyevdeki qırımtatarlar cemiyeti" CT İdaresi bu matem kunü er bir vatandaşına qol tutuv sözlerni bildire. "Mayıs 18 kunü bizler beraber olıp, Qırımdan sürgün olunğan ecdatlarımıznıñ ruhlarına dua oquycaqmız. Qırımğa avdet olıp, bizler qırımtatar halqı aq-uquqlarınıñ ğayrıdan tiklevi, medeniyet ve urf-adetlerimizniñ saqlap qalması içün kureşni devam etemiz" - qayd ete Cemiyet İdaresiniñ Yolbaşçısı Aslan OMER KIRIMLI.

 

www.qtmm.org malümatlarına esaslanıp

Foto