2012 senesi oktâbr 18 künü Aqmescitte «Qırımoğlu. Bir milletniñ küreşi» adlı vesiqalı filmi taqdim etilecek

Все новости
11 ekim 2012 yıl 15:54

 

 

                       

     "Qırımoğlu…Bir milletniñ küreşi" filminiñ müellifleri TRT kanalında bir sıra vesiqalı filmler yaratqan belli rejissörlar Neşe Sarısoy Qaratay ve Zafer Qaratay.

     Film müellifleri haber etkenine köre, taqdim merasiminde Türkiye Cumhuriyeti Baş naziriniñ muavini Bülent Arınçnıñ iştirak etmesi közde tutula.

     "Qırımoğlu…Bir milletniñ küreşi" filmi 1944 senesi mayıs 18-de Vatanından quvulğan qırımtatar halqınıñ sürgünligi aqqında, milletniñ Vatanğa qaytuv oğrundaki zorbalıqsız küreşi, bunıñ kibi de siyasiy mahbüs, uquqqoruyıcı, al-azırda Qırımtatar halqı Meclisiniñ reisi olğan Mustafa Cemilevniñ ömür yolu aqqında ikâye ete. Türkiyeniñ devlet televizion kanalında film oktâbr ayında numayış etilecek.

     Aqmescitte ise filmniñ premyerası 2012 senesi oktâbr 18 künü saat 19-da Kiyevskaya soqağı, 115 adresi boyunca yerleşken Profsoyuzlar medeniyet sarayında olacaq.

     Filmniñ prodüseri ve metininiñ müellifi Zafer Qarataynıñ bildirgenine köre, qırımtatarlar aqqında film Türkiyeniñ TRT devlet kanalı tarafından çıqarılıp, 270 daqqadan ibarettir. "Film 30 daqqalıq 9 qısımdan ibaret. Bu vesiqalı filmni azırlav, arhivlerde çalışuv ve redaktirlevge eki buçuq yıl sarf etildi", - dey Z. Qaratay.

     Film çekimleri Qırım, Ukraina, AQŞ, Türkiye, Belçika ve bunıñ kibi de Rusiyede yapıldı. Çekimler devamında dünyaca belli uquqqoruyıcılar Vladimir Bukovskiy, Sergey Kovalev, Lüdmila Alekseyeva, Yevgeniy Sverstük, Aleksandr Podrabinek, Miroslav Marinoviç, Yuriy Orlov, Pavel Litvinov, Andrey Grigorenko, Semen Gluzman, ve bunıñ kibi de qırımtatar milliy areket iştirakçilerinen subetler yazıp alındı.

     Filmde qırımtatarlarnıñ feciy taqdiri ve bugünki vaziyeti hususında fikirlerinen Ukraina Prezidenti Viktor Yanukoviç, Ukrainanıñ sabıq Prezidenti (1991-1994 gg) Leonid Kravçuk, Türkiye Prezidenti (1993-2000 gg) Suleyman Demirel, Baş naziri Turtsii Recep Tayip Erdoğan, Tış işleriniñ naziri Ahmet Davutoğlu kibi siyasetçiler paylaşalar.

     TRT kanalınıñ belli rejissörları Neşe Sarısoy Qaratay ve Zafer Qaratay çoq yıllardan berli vesiqalı filmler çıqarıp, öz işleri içün nufuzlı mukâfatlarnen taqdirlendiler.

     Film müellifleri Facebook sotsial ağında mahsus saife açtılar ve er bir istekli film aqqında kenişçe malümat alabilir.

Meclisi matbuat merkezi

Foto