2013 senesi fevralniñ 14-de Kiyevde Gennadiy Udovenko ile vedalaştılar

Все новости
15 şubat 2013 yıl 10:07

  Cenaze merasimi Ukraina Nazirler Şurasınıñ medeniyet Evinde ötkerildi. Belli ukrain siyasetçisi, Ukraina tışqı işler naziri, "Narodniy ruh" firqasınıñ yolbaşçısını soñki yolğa ozğarmaq içün Ukraina reberligi de keldi. Olarnıñ arasında — Ukraina baş naziri Nikolay Azarov, Ukraina Yuqarı Şurasınıñ reisi Vladimir Rıbak, baş nazir muavini Konstantin Grişçenko, Amerika Qoşma Ştatlarında Ukrainanıñ sabıq elçisi Öleg Belorus ve Ukrainanıñ üçünci prezidenti Viktor Yuşçenko.

  Qırımtatar halqı Meclisiniñ vekilleri olaraq Ukraina halq deputatı Mustafa Cemilevniñ yardımcısı Aleksey Skorik ve Kiyevde qırımtatarlar Cemiyetiniñ yolbaşçısı Aslan Ümerov "Qırımtatar halqı Meclisi adından" yazı ile çemberni qoydılar.

  2013 senesi fevralniñ 12-de 82 yaşında Gennadiy Udovenko — belli ukrain siyasiy erbabı, diplomat, Ukraina tışqı işler naziri (1994-1998), Birleşken Milletler Teşkilâtı Baş Assambleyasınıñ 52-inci sessiyasınıñ prezidenti (1997-1998), Ukraina Halq Areketiniñ yolbaşçısı (1999-2003), III-V çağırılışlarnıñ Ukraina halq deputatı bu dünyanı terk etti.

  Gennadiy Udovenko, Ukraina SSR yılları şekillengen, amma bütün bilgi ve tecribeni mustaqil Ukraina devletini meydanğa ketirmek içün bergen, Ukrainada demokratiya esasları, insan aqları ve halqlar aqlarınıñ tesbit etüvi içün fedakâr bir küreşni alıp barğan, nesilniñ eñ parlaq vekillerinden biri edi.

Cemiyetniñ matbuat merkezi

Foto