2013 senesi yanvarniñ 12-de Aqmescitte qırımtatar halqı V çağırılış Qurultayınıñ 5-inci sessiyası öz işini yekünledi

Все новости
12 ocak 2013 yıl 18:50

 

Yanvar 12 künü Aqmescit şeerindeki Qırımtatar Devlet Muzıkalı-drama Teatrinde Qırımtatar halqı V çağırılış Qurultayınıñ 5-inci sessiyası öz işini yekünledi.

Qırımtatar halqı V çağırılış Qurultayınıñ delegatları bir künlik iş devamında "Qırımtatar halqı Qurultayı delegatlarınıñ saylav nizamı"nı madde-maddenen muzakere etti ve tasdiqladılar. İşbu nizamnamege binayen, saylav esnasında qırımtatar cemaat ve siyasiy teşkilâtlar ve olarnıñ blokları iştirak ete bileler.

250 delegatlarnıñ saylavı qarışıq (majoritar-proportsional) sistema boyunca ötkerilecek.

Qırımtatar halqı Qurultayınıñ 50 delegatı proportsional sistema boyunca, Qırım Muhtar Cumhuriyeti, Zaporojye ve Herson vilâyetleri, Kiyev şeeri ve Özbekistan Cumhuriyetini qaplap alğan, yekâne çoq mandatlı saylav okrugda, qırımtatar cemaat, siyasiy teşkilâtları ve olarnıñ blokları cedvelleri boyunca saylanacaq.

200 delegat ise, Qırım Muhtar Cumhuriyeti, Zaporojye ve Herson vilâyetleri, Özbekistan Cumhuriyetinde Merkeziy saylav komissiyası tarafından belgilengen, çoq mandatlı majoritar saylav okruglarda ve, Kiyev şeeri ve Kiyev vilâyetiniñ meskün yerlerini qaplap alğan, bir mandatlı saylav okrugda saylanacaq.

Şunı da qayd etmeli ki, qabul etilgen "Qırımtatar halqı Qurultayı delegatlarınıñ saylav nizamı"nda, çoq mandatlı majoritar saylav okruglarnı maksimal sürette eksiltmege imkân bergen madde mevcut. Böyle etip, Qurultaynıñ eñ azdan 2 delegatı saylanılmalı.

Bundan da ğayrı, 2013 senesi yanvarniñ 12-de qırımtatar halqı V çağırılış Qurultayınıñ 5-inci sessiyasında böyle vesiqalar qabul etildi:

- ATIT devletlerine, Ukraina prezidentine "Avropada telükesizlik ve işbirlik boyunca teşkilâtta Ukrainanıñ reisligi — Ukrainanıñ Avropağa qatılması ve qırımtatar halqı aqlarınıñ ğayrıdan tiklenilmesine ümüt yılı" muracaatı;

- Qırımtatar halqı V Qurultayınıñ ukrain cemaatlığına "XX asırnıñ eki totalitar rejimi — kommunist ve natsist rejiminiñ cinayetleri insanlıqqa zıt olğanı içün er yerde qaralanmalı! Ukrainada stalin rejimini canlandırmaq areketleri yasaq etilmeli!";

- Ukraina prezidenti, Ukraina Yuqarı Şurasınıñ reisi, Ukraina baş nazirine "Simferopol" halqara ava limanına Sovetler Birliginiñ eki defa Qaramanı Amet-han Sultannıñ adı berilmesi aqqında" muracaatı.

Cemiyet matbuat merkezi

 

Foto